Wednesday, December 23, 2009

ليه بعد ماسيبتك!؟



ليه بعد ماسيبتك.. بحسك معايا

ليه بعد ماسيبتك.. بفضل اطمن عليك

ليه بعد ماسيبتك..لما تغيب اقلق عليك

ليه بعد ماسيبتك..وبعد كل حاجه بعملها معاك اندم انى عملتها

واسأل نفسى ليه عملتيها!..مش خلاص او مش من المفروض انه خلاص؟

انا مش عارفه اذا كان ده حب ولا حلاوه روح للحب اللى كان بينا؟

احيانا كتيره بفتكر اللى حصل واقول انا مش ممكن اطمن عليه او اسأل عنك تانى

ولاحتى اشوفك او اسمع صوتك..انا خلاص بجد

بس مش عارفه ايه اللى بيشدنى تانى انى ارجع

وامسك باايدى وبنفسى اللى رفضت انهم يكونوا معاك بقيت عمرك

تليفونى او ورقه وقلم اكلمك او اكتب عنك

ليه بعد ماسيبتنى كل ده بيحصل؟

ليه اوقات بنسى انك قتلتنى

انا بفضل ابرر لنفسى واقول ماترميش كل اللوم عليه برضه

اكيد انتى كمان غلطتى وتتلامى..بس برضه مش سبب يخلينى

اقبل على نفسى لحظات الجنون اللى بعملها..بس كل ماافوق ازعل اوى

انه لسه انا برضه زى ماانا مابحرمش منك ابداا..ولا بتوب

وبرضه انا اللى ببداء كل حاجه حتى فى الحنين انا برضه اللى بدايته

مش عارفه انا ليه بعمل فى نفسى كده؟

وليه بعد ماسيبتك..نسيت اشيلك من دماغى وحياتى!؟

ليه بعد ماسيبتك ..كل يوم قبل ماانا اتمنى انى اصحى من النوم وكأنك ماظهرتش فى حياتى من اصله

ليه بعد ماسيبتك..كل يوم اصحى وانا متخيله انى هشوفك وهكلمك وانى فى اى لحظه هتكون موجود فاتح دراعاتك عشان اترمى بينهم وانه قلبك هيرجع تانى ويحضنى..او انى حتى هتخانئق معاك على اتفه الاشياء اوهضحك او هبكى هعمل كل حاجه معاك انت

بس برضه لما بفوق بزعل وبندم على انه بقيت مجرد ذكريات واوهام

...بس اكيد هيجى اليوم اللى هصحى فيه ومش هتكون انت فيه

ماتزعلش منى ياقلبى انى بقول على حبيبك كده..بس اعذرنى لازم يخرج منك علشان تعرف تعيش حياتك

انا هخرجه عشان انت وهو تعرفوا تعيشوا حياتكم..ماينفعش خلاص ياقلبى..حتى لو قلبه لسه بيندهك لازم تخرجوا من بعض

...فاسامحنى

2 comments:

AHMED SAMIR said...

العود احمد
بمناسبة العودة
في تاج مهدى الى سيادتكم عندي في المدونة
يرجى سرعة الأجابة

meroooo said...

الله يخليك يااحمد
حاضر يافندم حااااااالا هشوفه وهرد
انت تامرنا امر