تخاريف

كل يوم بيعدي ويفوت
بحس اني بكبر
وبحس اني بفهم حاجات كنت فاكره اني فاهمها
احسن من اي حد في الدنيا
انا طول عمري ماعرفت حد اصغر مني
ديما كنت بحب اتعامل مع الناس اللي اكبر مني
كنت بحس ان دوال اللي من سني رغم انهم كان ممكن يكون سنهم
ضعف سني مرتين ع الاقل
بس لما كبرت بقي وعديت المرحله دي
بقي ليا اصحاب اصغر مني وبطلت استخف باللي اصغر مني
وراح مني احساس انهم عبط وهبل ومش فاهمين حاجه
بالعكس حسسوني بالندم علي عمري اللي ضيعته منغير مااعيش
حياتي وسني ويومي زي مايكون وزي ماهما كانوا بيعملوا
بس لما بعقد اسمعهم ولااقيهم بيعملوا اللي كنت بعمله بعقد اضحك
في الاول كنت بقولهم بلاش تعملوا كدا هتتعبوا وهتندموا لما تعدوا المرحله دي
بس دلوقتي بطلت اقول حاجه لاني لما اعقدت واتفرجت عليهم
لاقيتهم عارفين يعيشوا الاتنين احسن مني بكتير
يمكن عشان ظروف حياتي وايامي وسنين اللي عشتها كانت اقوي واشد منهم بكتير
ويمكن عشان انا كان غصب عني اني ابقي كبيره واتحمل المسئوليه من بدري
لكن هما بالنسبالهم حاجه تانيه خالص
بحس ان ليهم مسموح ليهم بالغط
اما انا ماكنش مسموح ليا بأي غلط بأي شكل من الاشكال
انا مش نفسي ارجع بعمري تاني ولاحاجه بس كنت بتمني اعرف اعيش عمري
وحتي دلوقتي انا حاسه اني برضه مش عايشه عمري
لاني بعد كل ده اكتشفت اني كنت مجرد متفرجه في حياتي اللي فاتت دي
اينعم انا عايشه بس دلوقتي لما بعقد مع نفسي وافتكر حياتي
بكتشفت اني كنت مجرد صدي لرد فعل اللي حواليا
كنت بجد من الكومبرس واحيانا كتيره كانت ببقي من المتفرجين
اكتر من كدا انا ماكنتش وحتي دلوقتي بحاول يكون ليا رده فعل
بس برضه بحس ان مالهاش مكان ولا ليها موقف
بحس ساعات اني بتلكك دلوقتي علي اي موقف يحصلي
عشان يكون ليا رده فعل انا اللي صناعها وعاملها
نفسي مااكونش صدي لااي حد تاني