اعقدت مع نفسي امبارح
واكتشفت اني كنت بتفرج علي حياتي كلها
ايوه بتفرج عليها من بره كاني ضيفه في الحياه وبتفرج
علي اللي بيدور حواليا من مواقف من مشاعرمن كله
لاقيت شريط حياتي كلها بيمر من قدام عنيا
لاقيت نفسي لا بقول علي مواقف لا او آه
اكتشفت اني لو كنت قولتهم ساعتها ماكنش هيقدم ولا هياخر
فجأه وقف شريط حياتي وسالني سؤال
هو انت ليه موقفك اللي كنت هتاخدي في اللي مر من حياتك مش هيقدم ولا هياخر؟
وحسيت بصمت فظيع حاسه بيه جوايا بيدور
قولت لنفسي يمكن عشان اللي حواليا شايفني ضيفه شرف في الحياه
لاقيته بيسالني تاني
وانتي ايه علاقتك باللي حواليكي انتي ذات نفسك ليه ماقولتيش لا او آه علي اللي كنتي بتشوفيه؟
قولته يمكن عشان احساس اللي حواليا اللي وصلني منهم هو اللي اداني شعور
ان رائي او موقفي مش هيقدم ولا ياخر بالنسبالهم وبالنسبالي
انا كده او كده ضيفه والمواقف اللي هاخدها
هاخدها برضه علي مواقف قدامي او تصرفات حد مش عجباني
فا لو قولت هما مش هيسمعهوا او ياخدوا بيها
فا كده او كده برضه رفضي او قبولي لموقف ما مر في حياتي
مش هيزيد ليا ولا اللي قدامي والعكس صحيح
وفجأه ولاقيت دمعه هاديه نزله من عنيا
كأنها بتقولي هي دي حياتك مشيت ببرود كده بدون اي فايده لا ليكي ولا لغيرك
وفي نفس الوقت حسيت انها بتطبطب عليا وبتقولي مش انتي بس
اللي ممكن يكون حاسس بده في غيرك ممكن يكونوا بيقولوا رائيهم ومش بيتسمع بيه
ورجعت للحيره تاني
ياتري اللي يقولوا ولا اللي مايقولش
ياتري انا كده سليمه وانا بتفرج علي حياتي وكأني ضيفه شرف فيها
ولا كنت لازام اقول واخد موقف قبل ما العمر يعدي واحس اني ماعملتش حاجه
اقول رائي اقول لنفسي دا رائي لنفسي مش ليهم
طب ازاي رائي هيكون مفيد لو مااتحققش واتنفذ بيه
مش شرط يتنفذ بس ازاي هعرف انه اتاخد بيه
وتفضلي يانفسي محتاره
مابين ياتقولي
آه ياتقولي لأ
واديني عايشه وانتي عايشه برضه يانفسي
No comments:
Post a Comment